أي سؤال عن الموتوسيكل الصيني انا تحت أمرك في 5 دقايق

السلام عليكم أخوانى الاعزاء
كونت محتاج أعرف موتوسكل الحلاوة أكس بركس الى شبة الدايون4 كويس ولا مش كويس وأيضا شوفت موتوسكل حلاوة شبة الريس ضخم بشكمان واحد معرفش رقمة كام دة أيضا كويس وسريع
أرجو معرفة رايكم

السلام عليكم
كونت عاوز أعرف رايكم فى الحلاوة الى شبه الديون4
وكمان شوفت موتوسكل حلاوة ضخم شبة الريس بشكمان واحد كونت عاوز اعرف أسمة وكويس ولا

يا عم بكاري هو الموتوسيكلات الحلاوه كلها حلوه بس فيه حاجات احسن من الحلاوه زي الدايون والهوجان
بس ابعد عن اي حاجه ريس لانها مش كويسه

انشاء الله قريبا جدول الصيانه حسب كتالوجات الموتوسيكلات الصيني

بص يا عم مصطفي

اكتر من كليو زيت هبوز الموتور

أما بالنسبه للقياده هيا زي العربيه بالظبط

بتحط المفاتح وتدوس على زرار المارش وتدور الماكنه بعدين بتدوس دبرياج وبتدي النقله الاولي وتسيب دبرياج وحده وحده هتلاقيها مشيت وخلاص

انا اشكرك على هذا الرد الجميل بس انا مسوقتش عربية قبل كده

أخي mostafa86

بالنسبة لشراء الموتوسيكل يا سيدي ألف مبروك وربنا يحفظك من شره - الموتوسيكل جميل جدا فوق ما تتخيل وركوبته ممتعه والله جدا - ومع ذلك هو خطر جدا
أنما أقدر أقولك كل لما تتقدم في السواقة كل لما تزيد امكانيات السواقة بتاعتك أصل كلنا اتعلمنا في الموتوسيكلات بتاعتنا السواقة ههههههههه

بالنسبة للزيت كيلو ونص كتير - صدقني كده غلط على المكنة اكتر حاجة تحطها كيلو وربع وكمان برضوه كتير
بالنسبة للسواقة بالتفصيل الممل :
بص يا سيدي :
أولا أنت بتعرف تسوق دراجات عادية ؟
أذا كان ايوه يبقي الموضوع بقي سهل شوية واذا كنت موش بتعرف يبقي هتلاقي شوية صعوبة
طيب أول حاجة - قبل أي حاجة - أركب على المكنة ومتشغلهاش وأقعد عليها شوية كده عشان تحفظ مكان الزراير وشكل الجادون يبقي معهود بالنسبة ليك - وبعدين برضه متشغلش الموتور - خلي حد يزقك من الخلف بالمكنة - وخليك على كده لحد ما تحفظ وزن المكنة بالنسبة لجسمك وده يعتبر أول تمرين وحاول تكرره كتير لحد ما تعرف أنك ما تنزلش رجلك من المكنة الا لما تقف خالص وكرر - وكرر - وكرر - لغاية ما تكون خدت على الوزن بتاع المكنة ووزنك عليها والتوازن

ثانيا أنت عارف معني الدبرياج ؟ لو موش عارف - الدبرياج بيستخدم لفصل حركة الموتور عن صندوق التروس (تروس السرعات) وطبعا الدبرياج بتمسكه ساعت لما تغير سرعات - طيب يا سيدي تبتدي حضرتك والمكنة على المور طبعا - تبتدي تدور المكنة بالمفتاح أبتدي سخن سنة سنة عشان تحس بقوة الموتور وعشان المكنة ما تبطلش منك
وبعدين أمسك الدبرياج عشان تجيب السرعة الأولي - وسرعات المكنة خمسة كلهم لتحت طبعا غير التوين والماركات العالمية بيقي الاول لتحت والباقي لفوق - عموما هتجيب الأول وانت ماسك دبرياج وموش هتسيب الدبرياج عشان المكنة ما تبطلش منك لان الدبرياج في حالة التوقف بتمسكه لما تكون على غيار وأنت واقف بس - المهم هتيجي بقي لانك تبتدي تدور كلاتش البنزين ودي بقي بتيجي بالممارسة انك تزود بنزين مع انك برضوه بتسيب دبرياج سنة سنة وبرضوه تزود البنزين سنة سنة - هتلاقي المكنة ابتدت تتحرك - وهتحس باحساس غريب كانك راكب حصان جامح وده لو زودت كتير بنزين بيحصل خصوصا انك بتتعلم - طيب حل المشكلة دي بيكون انك تجيب الاول وبعد كده تحاول تزود بنزين وتسيب الدبرياج سنة سنة وبعدين تسيب بنزين خالص وتمسك دبرياج - هتلاقي المكنة وقفت- تكرر الموضوع ده يجي 100 مرة كده - لحد ما تاخد على طلعة المكنة
المرحلة القادمة أنك تزود بنزين وتمشي على الغيار الاول - وما تنقلش الغيار بعد كده خالص - وتحاول تمشي عليه بس بدون ما تزود السرعة بتاعت الاول عشان ما ترهقش الموتور - وتفضل على كده لحد ما انك متنزلش رجلك خالص وتكرر الموضوع ده يجي 200 مرة
المرحلة القادمة هي التحويد - أنك تتعلم تحود بالمكنة وده بيقي صعب في الاول - عموما حاول تظبط نفسك وانت ماشي على الغيار الاول وحاول تحود يمين او شمال - وده طبعا في مكان فاضي عشان تبقي براحتك - برضوه كرر الموضوع ده حوالي 1000 مرة لحد ما تتعود
المرحلة القادمة تحاول انك لما تيجي تتوقف متنزلش رجلك الا لما توقف خالص برضوه كرر 10000 مرة
المرحلة القادمة الغيار الثاني وانت ماشي على الاول بيقي كل غيار ليه آخر لو زودت عنه بترهق الموتور طيب وانت على آخر الاول (أمسك دبرياج) ودوس على دواسة السرعات لتحت هتلاقي نفسك على الثاني - سيب الدبرياج وزود سرعة - هتحس انك سريع قوي قوي - بس متخافش امشي على التاني لحد ما تلاقي نفسك كويس وخدت على السرعة بعدها هات التالث والرابع زي ما انت عاوز
وخلي بالك من سرعتك في العداد ومتزودش عن 50 ك عشان ربنا يسترها معاك ومعانا وبعدين كرر كل ده كتيييييييييييييير - لحد ما تاخد على الغيارات
طيب انت على الغيار الثالث وفجأه جات حاجة قصادك تعمل ايه طبعا الجواب معروف هتمسك فرامل جامد اللي ورا لو المكنة ما وقفتش بسرعة امسك قدام خفيف مع اللي ورا هتلاقي استجابة الوقوق اسرع - وعشان تبقي أستاذ أمسك دبرياج مع الفرامل عشان لما توقف المكنة ماتبطلش
ومثلا برضوه انت على الغيار الثالث مثلا عاوز تجيب الاول (وطبعا) ده في حالة انك بتهدي بس - اوعي تعمل كده وانت سريع الموتور يبوظ منك في فترة قصيرة - المهم عاوز تجيب الاول عشان تقف في اشارة مثلا هتمسك دبرياج وترفع الدواسة لفوق مرتين وهكذا يا باشا كل غيار اقل عاوز تجيبه تعد مع العداد درجات لفوق
وفي ملاحظة لازم تعرفها ان الغيار المناسب لازم يجي في السرعة المناسبة عشان تبقي ماشي كويس

عموما دي محاولة مني انك تستفيد من الموضوع ده - وباذن الله هتكون كويس جدا وكل حاجة ممارسة يا باشا

لو في اي سؤال انا موجود يا باشا

سلام